NAVIDAD EN CHABACANO DE ZAMBOANGA

  ¡FELIZ NAVIDAD!

    Los fieles católicos nos preparamos durante del tiempo de Adviento a celebrar la venida del Hijo de Dios, de Jesús, el Mesías, el Señor. Esto es la NAVIDAD.

   ¿Cómo fue la primera Navidad? Lo vamos a descubrir leyendo las páginas del NUEVO TESTAMENTO NA CHAVACANO. El chavacano es un dialecto del idioma español que se habla en Cavite, Ternate, Zamboanga, Basilan. En cada una de estas zonas se habla de forma diferente, la variedad que más hablantes tiene es la de Zamboanga, que es en la que está escrita este libro.

   El Angel ya entra y ya habla con Ele:"Alegra, lleno de Gracia! El Señor talli contigo!" Si Maria ya queda destorbao por causa de este maga palabra y ya pensa le na su corazon, di cosa ba cajah quiere decir este saludo.

   El Angel ya habla con ele :"Maria , no tene miedo, cay el Dios ya considera contigo. Mira tu: Ay man preñada tu y ay pari tu un anak hombre y ay llama tu con ele Jesus. Ele ay queda importante y ay llama con Ele Anak del Bein Alto Dios. El Señor Dios ay dale con Ele el trono del disuyo tata si David. Ay queda Le el Rey del familia de Jacob hasta para cuando, y el disuyo Reino gendeh gayot ay tenen fin."

   Si Maria ya habla con el Angel: "Paquemodo man este ay sucede, cay dalaga man yo? El Angel ya contesta co ele: "El Espiritu Santo ay vene contigo y el Poder del Bien Alto Dios ay cubri contigo con el disuyo sombra. Por eso, el bata que ay nace contigo ay llama sila santo, el Anak del Dios. Mira tu: El dituyo pariente si Isabeel ya queda tamen preñada y este ya ahora el ica-seis mes del disuyo paca-preñada, ele con quien ta llama sila esteril, Cay noay cosa imposible para con Dios."

   Si Maria ya habla: "Muchacha yo del Señor. Manda sucede conmigo, el cosa ya habla tu." Despues, el Angel ya deja con ele. Lucas 1; 26-38.

   El disuyo marido, si Jose, cay ele un gente de buen constumbre, noay quiere manda man juya con Maria. Poreso ya decide le separta con Mariade secreto lang. Ansina le ta plania hace, cuando el Angel del Señor ya aparece con elena un sueño y ya habla: "Jose, anak de David, no tene miedo recivi na casa con el dituyo mujer si Maria, cay ele ya queda priñada por medio del Espirito Santo. Ay pari le un anak hombre y tu ay llama con ele Jesus, cay ele ay salva con su maga gente na diila maga pecado." Ahora, todo este ya sucede para cumpli el cosa el Señor ya anuncia por medio del Profeta: El dalaga ay queda priñada y ay pari un anak hombre, y ay llama sila con ele Emmanuel, que quiere decir: El Dios taqui canaton.

   Cuando si Jose ya desperta, ya hace le el cosa el Angel del Señor ya manda con ele, y ya recivi le con su mujer na disuyo casa. Y maskin noay sila tene relacion, ya pari si Maria un anak hombre y si Jose ya llama con ele Jesus. Mateo 1; 19-25.

   Aquel tiempo, si Cesar Augusto ya dale un orden para manda con todo el maga gente anda registra para un censo. Este el primer censo ya hace cuando si Quirino amo el gobernador de Siria. Todo el maga gente ya anda registra, cada y cual na su pueblo. Si Jose ya sale tamen na pueblo de Nazaret na Galilea y ya anda para na Judea, na ciudad de David que ta llama Belen. Si Jose un miembro del familia y descendencia de David. Poreso, ya anda le na Belen para registra junto con Maria, el disuyo mujer quien preñada ya. Y mientras talla sila na Belen, el tiempo ya llega ya con Maria para pari. Ya pari le con el disuyo primero anak, ya envolve con Ele na lampin y ya hace con ele acosta na un pasungan, cay noay sila cuarto donde queda na posada. Lucas 2; 1-7.

   Alla na aquel lugar tiene maga pastor ta durmi na sereno y ta vicia con turno durante el noche, con el diila maga carnero. El Angel del Señor ya aparece canila y el Gloria del Señor ya envolve canila con su luz y ya tene gayot sila miedo. Pero el Angel ya habla canila: "No ustedes tene miedo, cay ta anuncia yo con ustedes un bien alegre noticia que ay dale gayot alegria con todo el maga gente de Israel. Este dia ya nace un Salvador para de ustedes na pueblo de David. Ele amo el Cristo Señor. Este el señal para sabe ustedes: Ay encontra ustedes un bata envuelto de lampin, acostao na un pasungan." Derepente, bien mucho gayot maga viviente del cielo ya man junto con el Angel y ya alba sila con el Dios hablando: "Gloria con el Dios na mas alto cielo y paz na mundo con el maga gente con quien ta ama Le." Lucas 2; 8-14.

   Despues de ocho dias ya llega el tiempo para man tulih con el bata. Ya llama sila con ele Jesus, el nombre que el Angel ya dale con ele cuando noay pa man preñada con Ele su nana. Lucas 2; 21.

   Cuando ya llega el tiempo para hace el ceremonia del lavada del diila cuerpo, comforme na Ley de Moises, ya lleva sila con Jesus na Jerusalem para presenta con el Señor, asegun como el cosa escribido na Ley del Señor: Todo el primero maga bata hombre nacido ay queda consagrao para con el Señor. Y ya anda tamen sila ofrece, como sacrificio, dos tortola o dos pichon de paloma comforme ta manda el Ley del Señor.

   Tiene alla na Jerusalem un gente, su nombre si Simon. Ele un buen gente y devoto. Ta espera le el consuelo de Israel y el Espiritu Santo talla con ele. Ya manda con ele sabe el Espiritu Santo cay gendeh le ay muri hasta ay puede le mira con el Cristo el Señor. Lucas 2; 22-26.

   Tiene tamen alla un profeta mujer, su nombre si Ana, anak le de Fanuel, del tribo de Aser, bien vieja ya gayot le. Estaba le casao por siete años y despues ya queda le un viuda. Ochenta y cuatro años el disuyo edad y noay le nunca sale na Templo. De dia y de noche ta servi le con Dios por medio de ayuno y maga rezo. Lucas 2; 36-37. 

   Si Jesus ya nace na Belen, un pueblo de Judia, durante el tiempo cuando si Herodes amo el rey. Tiene maga gente estudia estaba na Oriente ya llega na Jerusalem. Ya pregunta sila: "Donde man el rey del maga Judio, quien amo pa lang ya nace? Ya mira came el disuyo estrella na Oriente y ya vene came para adora con ele." Mateo 2; 1-2.

   Entonces si Herodes ya llama con el maga gente estudiao na un secreto miting y ya pregunta canila el exacto tiempo cuando ya abuya el estrella . Despues ya imvia le canila para na Belen y ya habla: "Anda ustedes y avirigua todo acerca de ese bata; y si ay encontra ya ustedes con ele, avisa conmigo para puede tamen yo anda adora con ele." Mateo 2; 7-8.

   Ya anda sila adentro na casa y ya mira sila con el bata y con su nana si Maria. Ya man culup sila na tierra y ya adora con ele. Acabar, ya abri sila el diila maga tesoro y ya ofrece con ele maga regalo de oro, incienso y mirra. Mateo, 2; 11.

   Cuando ya sale sila, El Angel del Señor ya aparece na un sueño con Jose y ya habla con ele: "Levanta, saca con el bata y su nana y escapa para na Egipto. Y esta alla hasta ay avisa yo contigo. Cay si Herodes ta busca con el bata para mata con ele." Si Jose ya levanta, ya saca con el bata y con su nana y ya sale aquel mismo noche para na Egipto. Mateo 2; 13-14.

   Cuando ya sabe si Herodes cay el maga gente estudiao ya hace loco con ele, ya rabia gayot le y ya manda mata con todo el maga bata hombre na Belen y maga barrio alrededor, de edad de dos años o menos, asegun el tiempo que ele ya puede sabe con el maga gente estudiao. Mateo 2;16.