CORPUS CHRISTI

 

MAGA  HEBREO 9 : 11-15.

Pero cuando si Cristo ya vene como el Sumo Padre del maga cosa-cosa bueno que ya vene, pues entonces por medio del mas grande y perfecto tolda (gendeh hacido de maga mano, quiere decir, gendeh de este creacion), ya entra Le na Lugar Sagrado una vez lang y hasta para cuando, gendeh con el sangre de maga cabrito y maga vaquita, sino con el disuyo mismo sangre, ansina ya obtene el salvacion eterno.

Cay si el sange del maga cabrito y maga toro, y el ta salpica maga ceniza de un vaca mujer, ta santifica con aquellos quien ya queda manchao, y ta hace limpio el diila cuerpo, gendeh ba mas bueno pa el sangre de Cristo, quien por medio del Espiritu eterno ya ofrece con Dios su mismo cuerpo sin mancha, ya purifica el diaton maga conciencia desde maga mal trabajo para adora con el Dios vivo.

MARCOS 14 : 12-16, 22-26.

El primer dia del fiesta del Pan noay Levadura, cuando ta mata con el carnero del Pascua, el maga dicipulo ya pregunta con Jesus:"Donde Uste quierre que prepara came el cena del Pascua para de Usted? Entonces, si Jesus ya imvia con dos del maga dicipulo y ya habla canila:"Anda ustedes na puebl. Alli ay hace con ustedes encuentro un hombre quien ta carga un tinaja de agua. Sigui ustedes con ele y, si donde le ay entra, habla ustedes con el dueño del casa: El maestro ta pregunta: Donde man el cuarto dimio para celebra Yo el Pascua junto con dimio maga dicipulo? Ele ay dale mira con ustedes un cuarto grande na segundo piso, preparao y arreglao ya. Hace ustedes alli el maga preparacion para diaton." El maga dicipulo ya anda, y ya llega na ciudad, y ya encontra todo como ya habla si Jesus canila, y ya prepara silo el Pascua.

Mientra ta come sila, si Jesus ya saca pan, y ya bendici con ese. Despues ya parti Le con ese, y ya dale canila y ya habla:"Saca ustedes este, Este amo el dimio Cuerpo." Despues, ya saca Le el copa, y ya dale gracias con Dios, despues ya dale se canila todo, y ya toma sila. Y ya habla Le canila:"Este amo el dimio Sangre, el Sangre del Contrata, que ay derrama para de mucho maga gente. Ta asegura Yo con ustedes que gendeh mas Yo ay toma vino hasta el dia cuando ay toma Yo el nuevo vino na Reino del Dios."

Cuando ya acaba ya sila canta el maga cancion de alabanza, ya anda sila todo na mnte del maga olivo.

*EL NUEVO TESTAMENTO NA CHAVACANO. (Claretian Publications).